योनिकन्दनिदानम्

श्लोक  1-2

योनिकन्दस्य निदानपूर्वकं सामान्यलक्षणम्

अथ योनिकन्दनिदानम् |
दिवास्वप्नादतिक्रोधाद्व्यायामादतिमैथुनात् |
क्षताच्च नखदन्ताद्यैर्वाताद्याः कुपिता यदा ||१||

पूयशोणितसङ्काशं निकुचाकृतिसन्निभम् |
जनयन्ति यदा योनौ नाम्ना कन्दः स योनिजः ||२||

श्लोक  3-4

योनिकन्दस्य वातजादिभेदेन लक्षणानि

रूक्षं विवर्णं स्फुटितं वातिकं तं विनिर्दिशेत् |
दाहरागज्वरयुतं विद्यात् पित्तात्मकं तु तम् ||३||

नीलपुष्पप्रतीकाशं कण्डूमन्तं कफात्मकम् |
सर्वलिङ्गसमायुक्तं सन्निपातात्मकं विदुः ||४||

पुष्पिका

इति श्रीमाधवकरविरचिते माधवनिदाने योनिकन्दनिदानं समाप्तम्  ||६३||