शकुनीप्रतिषेधाध्यायः

श्लोक 1-2

अथातः शकुनीप्रतिषेधं व्याख्यास्यामः ||१||

यथोवाच भगवान् धन्वन्तरिः ||२||

श्लोक 3

शकुन्यभिपरीतस्य कार्यो वैद्येन जानता |
वेतसाम्रकपित्थानां निष्क्वाथः परिषेचने ||३||

श्लोक 4

कषायमधुरौस्तैलं कार्यमभ्यञ्जने शिशोः |४|

श्लोक 4-5

मधुकोशीरह्रीबेरसारिवोत्पलपद्मकैः ||४||

रोध्रप्रियङ्गुमञ्जिष्ठागैरिकैः प्रदिहेच्छिशुम् |५|

श्लोक 5

व्रणेषूक्तानि चूर्णानि पथ्यानि विविधानि च ||५||

श्लोक 6

स्कन्दग्रहे धूपनानि तानीहापि प्रयोजयेत् |६|

श्लोक 6-7

शतावरीमृगैर्वारुनागदन्तीनिदिग्धिकाः ||६||

लक्ष्मणां सहदेवां च बृहतीं चापि धारयेत् |७|

श्लोक 7-8

तिलतण्डुलकं माल्यं हरितालं मनःशिला ||७||

बलिरेष करञ्जेषु निवेद्यो नियतात्मना |८|

श्लोक 8

निष्कुटे च प्रयोक्तव्यं स्नानमस्य यथाविधि ||८||

श्लोक 9

स्कन्दापस्मारशमनं घृतं चापीह पूजितम् |९|

श्लोक 9

कुर्याच्च विविधां पूजां शकुन्याः कुसुमैः शुभैः ||९||

श्लोक 10-11

अन्तरीक्षचरा देवी सर्वालङ्कारभूषिता |
अयोमुखी तीक्ष्णतुण्डा शकुनी ते प्रसीदतु ||१०||

दुर्दर्शना महाकाया पिङ्गाक्षी भैरवस्वरा |
लम्बोदरी शङ्कुकर्णी शकुनी ते प्रसीदतु ||११||

पुष्पिका

इति सुश्रुतसंहितायामुत्तरतन्त्रान्तर्गते कुमारतन्त्रे शकुनीप्रतिषेधो  नाम  (चतुर्थोऽध्यायः, आदितः) त्रिंशोऽध्यायः ||३०||